雙甘日記

又有人中毒呀~~~

2008-09-18T18:45:00.000-07:00

唔駛驚... 係中 DSLR 毒啫... 貓奴哥哥買 o左新相機, 俾 o的新相大家睇 o下先啦~~

精靈百厭 o既摺耳豬

2008-07-13T19:39:00.000-07:00

正式宣佈, 叻 B 取名為 Audi. 點解? 因為一開個籠門佢就好似跑車咁標 o左去囉, 哈哈

再 o黎宣佈, Audi 已收歸國有, 請熱烈歡迎呢位新成員加入雙甘大家庭 ~~

Audi 宜家比初初 o黎 o個陣長 o左一倍呀, 睇 o下佢 o的新相先啦

係咪好靚仔呢 ~~

再 o黎仔仔露露 o既靚相

警報 ! 有不明來歷 o既入侵者 !! 全體進入戒備狀態 !!!

多謝 Ray 哥哥幫佢 o地影 o左咁多靚相呀 ~~

叻仔貓 B

2008-06-12T20:55:00.000-07:00

因為貓奴哥哥姐姐無暫託經驗, 仲要今次係照顧病 B, Ray 哥哥好好人咁分擔湊 B 工作, 上星期接 o左銀灰色 o個對仔女去佢度。哥哥姐姐就專心湊 o個隻打針時鬧人同輾蓆 o既細 B。

細 B 康復得算快, 個零星期 o的毛已經靚返哂, 眼仔又好返, 精靈爛玩, 見到哥哥會 o係籠入面跟住哥哥行來行去, 姐姐嗌佢佢識喵住 o黎應姐姐, 見到籠頂枝逗貓棒仲會想爬上籠攞枝貓棒添 ~~~

尋日哥哥姐姐又帶細 B 去 Dr. Betty 度 check 多次, 細 B 一出貓袋就同 Dr. Betty 玩, 仲打呼嚕, 氹到 Dr. Betty 好開心。Dr. Betty 就話佢靚仔, 係瘦弱 o左 o的, 要谷返肥佢, 無乜其他大問題, 俾心機湊佢就可以, 唔駛太擔心。

原來細 B 係蘇格蘭摺耳, 仲要係摺 o左耳仔咖啦 ~~

細 B 快 o的食多 o的o野, 健健康康, 快高長大。好想快o的俾你見 o下仔仔露露, 開開心心一齊玩。

誤墮凡間的天使 -- B女，一路好走

2008-06-09T21:40:00.000-07:00

B女離開了…

6月6號晚, 哥哥發覺B女唔係幾妥, 唔精神, 淨係訓覺, 抬頭都無力。抱起佢, 手腳軟軟, 姐姐同哥哥即刻帶佢睇夜診。

診所好多人, 等緊 o既時候見到待領養 o既貓貓精靈活潑, 姐姐係咁叫B女撐住, 好快可以見醫生, 食o左藥就可以好似 o個 o的朋友仔咁, 同哥哥姐姐一齊玩, 有爸爸媽媽錫。

獸醫話B女感染 o左隻好新 o既病毒, 應該係經母體或跌o左落污糟水感染, 無論係病毒本身定係隻藥都好高危險性, 貓B應該生存機會好低。獸醫建議“put her to sleep”, 因為佢好大機會捱唔過呢一關。姐姐決定俾個機會B女, 請獸醫俾 o的 simple treatment 佢。獸醫幫佢打 o左 2 大枝皮下水, 1 細枝葡萄糖, B女即刻企起身四圍走。哥哥姐姐都以為佢捱得過。獸醫再開 o左o的抗生素同葡萄糖粉俾佢, 叫哥哥姐姐兩三日後再帶B女覆診, “if she still alives.” 夜晚 12 點半, 哥哥稍為安心, 帶B女返屋企。

6月7號朝早7點幾, 哥哥睇過B女, 仲好好o地。9點幾, 哥哥打俾姐姐, 話抱B女無反應, 抱起佢滴尿, 無心跳, 瞳孔無焦點, 眼珠乾o左。B女無聲無色咁走 o左...

盡o左力救佢, 但係B女都係過唔到呢關, 有o的無奈。遺憾 o既係佢走 o既時候無人 o係佢身邊陪住佢離開。唯有寄望其餘 3 小 B 健康成長。

B女, 一路好走。去到彩虹橋, 要開開心心, 記得守護你 o既哥哥姐姐。

突如其來的4小B

2008-06-05T01:35:00.000-07:00

呢幾日, 貓奴哥哥姐姐加仔仔露露 o既安樂生活發生 o左一段小插曲。

話說哥哥6月2號晚去剪頭髮, 差不多搞掂走得 o既時候, 髮型屋有人拎 o左袋o野返去。佢o地o係度議論紛紛, 哥哥又隱約聽到 o的怪聲, 於是就問佢o地咩事。睇真 o的原來係個寵物袋, 裡面有 4 隻貓 B !!! o的怪聲就係佢 o地 o既喵聲。

哥哥加入討論, 諗梗點處理佢 o地, 髮型屋 o既人一係就未養過貓, 一係就屋企已經有 4 隻貓, 哥哥又未湊過貓 B。無計可施之下, 哥哥唯有 call 姐姐, 睇 o下會唔會搵到義工幫手。但係姐姐搵o左幾個義工朋友, 都話宜家 o的暫託好爆, 收唔到新貓。如果我 o地帶到貓 B 返屋企就最好, 如果唔得 o既, 唯有 call 愛協收貓。但係如果貓 B 有少少鼻水, 愛協都可能會打針咖啦… 眼見佢o地咁精靈, 哥哥姐姐都養開貓, 邊忍心唔理佢o地丫… 所以即刻去寵物用品店買o左 BB 糧, 就帶o左佢 o地返屋企。

一返到屋企, 即刻同仔仔露露隔離, 放佢o地入紙箱, 一放糧佢o地就擁埋去食, 唉... 實係餓o左成日啦… 又係咁飲水, 成兜仔飲哂呀, 真係好可憐。佢o地食完o野不知幾好力, 係咁腳撐撐四圍行, 有一隻仲咬姐姐, 搞到姐姐隻手指公有個窿仔。

佢o地大約一個月大, 懷疑係o的人自己繁殖, 跟住有問題就丟 o左佢 o地, 所以估計之前應該係跟過貓媽媽, 因此識去砂盤, 識舔毛。o的人真係好過份, 用貓袋入住放o係垃圾房隔離o的花槽, o個日仲係咁落雨, 搞到佢o地一身都係屎加泥, 耳仔超污糟。哥哥姐姐用暖濕毛巾幫佢o地抺完用風筒吹乾, 剪指甲, 用化妝棉濕洗耳水幫佢o地抺耳仔, 搞到夜晚2點幾。

6月3號晚 Ray 哥哥上 o左去睇貓 B, 幫佢o地再洗多次耳仔, 話應該生癬同眼仔有事, 不過其他都無乜大問題, 無第三眼簾, 食得疴得。皮膚都仲係小問題, 佢o地都好生猛, 醫返好皮膚同眼仔就應該會好靚仔咖啦。於是哥哥約o左之後 o個晚睇獸醫。

6月4號, 獸醫證實貓 B 有疥癬蟲, 幫佢o地打針, 有一隻特別野蠻, 又超爆笑, 隻隻打針都係拮落去 o個下呻吟 o左一聲, 係佢先好似 BB 喊咁哇哇叫, 仲要o係條毛巾上面輾床輾蓆, 笑死所有人。獸醫話佢 o地係長毛貓, 真係陰公, 咁都俾人丟出 o黎。

返到屋企, 洗耳仔抺身洗眼餵藥, 貓 B 雖然都有掙扎, 但係都算係幾順利。獸醫開 o左一個月藥, 希望貓 B 快 o的好返, 哥哥姐姐就幫佢 o地搵爸爸媽媽錫錫啦。

今次真係哥哥姐姐人生一個閱歷, 不過仔仔露露就慘 o的, 因為哥哥姐姐掂過貓B 驚傳染唔敢掂佢 o地, 露露仲係咁跟住姐姐, 好似玩捉迷藏咁。仔仔露露唔好嬲姐姐, 遲 o的姐姐錫錫, 同你玩餵你食蟹柳補數啦。

復活節特備節目

2008-03-30T23:02:00.000-07:00

o岩 o岩過 o左 o既一連 4日復活節假期，天氣回暖，所以貓奴為仔仔露露炮製 o左特備節目 -- 洗白白。

眼見露露 o的白毛越 o黎越黃，貓奴實在睇唔過眼。露露靚女 o黎咖嘛，點可以做污糟貓咖... 本來打算帶佢o地去寵物店洗白白，問朋友攞相熟 o既寵物店地址，朋友卻建議我o地自己同佢沖涼，因為短毛貓應該唔難 handle。就係咁，貓奴哥哥同姐姐就同仔仔露露玩 o左半日。

因為仔仔不嬲都易話圍 o的，所以佢就做 o左先鋒。成個過程，仔仔好明顯係好驚，不過可能哥哥姐姐一路都抱住佢，佢一聲都無嗌過，淨係係咁震。到最後吹毛 o既時候，哥哥姐姐一絲不苟同仔仔吹毛梳毛，少爺仔有少少發脾氣，咬姐姐隻手呀，姐姐就係咁打乞嚏流鼻水，因為吹到o的毛周圍飛呀~~~

幫仔仔洗完白白，用 o左個半鐘，哥哥姐姐就已經散哂，要抖成個幾兩個鐘先可以再幫千金沖涼。

都預 o左平時會 o係水機玩水 o既千金都係怕水咖啦，但係無諗過佢細膽成咁啫。全程都o係度嗌，仲要嗌到好似男人聲咁，哥哥姐姐都俾佢笑死，隔離屋肯定以為我 o地o係度宰貓。

經過幫仔仔吹毛一役，姐姐今次醒目，全程都戴住口罩，所以無再做鼻涕蟲。

最後就緊係即刻開蟹柳絲俾兩個香噴噴，o的毛又軟又乾淨 o既靚靚少爺千金食啦。好彩佢 o地唔記仇，轉頭就 o係哥哥姐姐大脾訓覺啦。抵錫~~

情人節前夕採貓記

2008-02-18T07:41:00.000-08:00

情人節前一晚, Ray 哥哥同姐姐上 o左 o黎探仔仔露露。兩個細路好似認得哥哥姐姐, 一 o的都唔驚, 係咁聞哥哥姐姐 o的 o野。露露無 o的儀態, 蝦哥哥姐姐, 又爭 o野玩又搶仔仔 o的 o野食, 平時教佢 o既 o野唔記得哂啦, 失禮死人, Ray 哥哥同姐姐唔好介意。

Ray 哥哥仲幫兩個細路影 o左好多靚相。

見到仔仔呢個樣, 係咪想一啖啜落去呢~~~

露露, 你斯文 o的啦

係啦係啦, 好快有得食啦... 等等啦... 真係醜死怪

對面的男孩看過來...

看過來...

你睇佢 o地幾乖~~~

仔仔露露 o個晚真係發達啦~~~ 又蟹柳絲又魚柳。食飽飽露露仲 o係我 o既臂彎度訓 o左陣添, sweet sweet 呀 ~~

新年禮物 - 新玩具

2008-01-29T22:32:00.000-08:00

新年到, 仔仔露露又有新玩具, 就係期待已久 o既... ... 高過個人 o既貓樹嘞~~~

棵貓樹都未砌好, 露露已經跳 o左上去~~~

呢個新 o野好似好好玩咁喎...

仲有我至愛 o既波波添~~

間屋好舒服呀~~~

喂! 間屋我咖喎... 告你擅闖民居丫嗱 !

你兩個貓奴仲唔向朕請安 ??

如事者, 仔仔露露 o個晚 o係棵樹上面玩到癲 o左, 超開心。可能天氣凍, 地板更凍, 兩個細路都留 o係棵樹上面唔願落地。

到 o左第二朝, 樹上面其中一個波波已經俾佢 o地 KO o左 ~~ XD ~~

玩砂

2008-01-07T20:05:00.000-08:00

露露近排成日賴尿, 仲要專揀哥哥張床o黎疴。同 Sugar 姐姐傾過之後, 得出o既結論係阿千金可能嫌隻木砂"銀"腳, 所以唔鍾意去砂盤。哥哥唯有換隻新貓砂試o下情況有冇改善。

o岩o岩換o左砂, 帶o左阿千金入砂盤, 佢係咁o係度聞, 仲要o係度舐, 跟住哥哥醒起唔記得留返少少佢舊金o係度, 佢可能唔認得陣味。

擾攘完一輪之後, 諗住靜觀其變。點知阿仔又走o左去玩砂, 挖都一地都係。唉... 阿仔, 玩完好去廁所啦, 記得教曉露露, 唔好再o係哥哥張床度賴尿啦。

Dogs have owners Cats have staff - 下集

2007-12-04T20:14:00.001-08:00

哥哥早兩日朝早準備返工, 仔仔就係咁跟出跟入。當哥哥去開門出門口o既時候, 仔仔竟然跳上擺近門口 o既砂盤頂, 一手"禁"住哥哥隻手唔俾佢開門。

哥哥幾經掙扎出o左門口之後, 即刻打電話俾姐姐認叻啦。

姐姐就話：「你咪妄想啦... 你係咪呢個禮拜未俾魚柳仔仔露露食呀...?」

哥哥唔信邪, o個晚返到屋企就開o左魚柳俾仔仔露露食。跟住第二朝... 仔仔就無再跟住哥哥啦。哇哈哈...

笨蛋, 仔仔唔係唔捨得你呀, 係要你俾「買路魚」咋！哈哈哈...

Dogs have owners Cats have staff - 上集

2007-12-04T20:14:00.000-08:00

呢句說話果然無錯。點解? 解說 !!

個案一

仔仔：喵~~~

貓奴哥哥：仔仔你要咩呀?

仔仔 (望住貓奴哥哥)：喵~~~

貓奴哥哥：仔仔你要咩你帶我去啦。

仔仔邊行邊回望貓奴哥哥, 似係要肯定哥哥有跟住佢行。卒之行到佢個廁所就停o左o係度。

哦... 原來要哥哥幫佢執屎~~~ = =”

仔仔原來係識點人做o野...

個案二

事發地點: 貓奴哥哥o既睡房

露露扭貓奴哥哥抱, 抱得佢舒服到咪哂眼之際, 露露突然掙扎跳開, 跑去姐姐個新枕頭 (註: 只係買o左一日) 踎o係度, 望一望貓奴哥哥, 跟住... 疴尿!!

貓奴哥哥o既反應: 滴汗加無奈

姐姐事後聽完事發經過後o既反應: 露露好叻喎... 識揀姐姐個枕頭, 唔o係哥哥個枕頭度疴, 緊係知哥哥係米飯班主唔得罪得嗱~~~

阿貓奴哥哥... 我早一日先同你講睇住我個新枕頭咋... ~"~

搬屋

2007-11-25T20:45:00.000-08:00

貓奴尋日搬屋, 搵 o左師父幫手上 o黎搬 o野落樓。仔仔同露露見到有陌生人出出入入, 有 o的驚。入 o左貓袋帶佢 o地落樓, 點知架車未到, 等緊 o既時候可能俾 o的車聲人聲嚇親, 阿仔喵到癲 o左, 係咁撞個貓袋想出 o黎, 連最愛 o既蟹柳絲都唔食, 反而阿女就話知你, 大覺訓。

去到新屋樓 o下, 條街靜 o的, 阿仔先定 o的。入到新屋, 暫時困住仔仔同露露, 又唔係好食 o野飲水去廁所。o的 o野執好少少就緊係即刻開罐罐俾對仔女食啦。可能成日無乜點食 o野, 9秒9 火速洗碟!!! 陰公囉... 今日嚇死貓豬, 有罐罐食唔好嬲呀。

仔仔飲過水去過廁所，就好安定咁 o係個籠入面訓 o左覺。阿女就成日都唔肯去廁所，因為呢兩日都唔放心俾佢 o地通屋走, 貓奴唯有狠心 o的捉阿女入砂盤。露露, 你乖... 唔好嬲哥哥呀~~~

到 o左今朝仔仔露露都識得飲水同去廁所啦, 叻叻!!

雙甘攝影集

2007-11-07T20:03:00.000-08:00

為答謝各方好友支持, 雙甘決定...... 出攝影集~~~

阿仔真係幾時都咁英!!

阿仔呀... 哈佬喂過o左啦... 你仲唔收返埋你o的牙?!

好sweet 呀...

猜情尋...

唉呀! 俾人發現o左我o地添~~

駛唔駛攬得咁實呀...

呢個情景係咪似曾相識?

阿女, 你o的身手好得喎...

女呀... 你女仔o黎咖... 俾o的儀態啦...

成1000 watt 電, 問你暈未!

我o地o既泊車技術係咪一流呢~~~

「猶如巡行和匯演

你眼光只接觸我側面...」

結婚沙龍???

2007-10-02T08:57:00.000-07:00

又係時候 post o的相俾大家睇啦~~係咪等到頸都長呢~~ 今次係由另一位哥哥揸機，簡直係大師級水準呀。靚到好似 -- 結婚沙龍。哇哈哈哈哈~~~

好 sweet 呀~~ 但係仔仔露露，乜你 o地唔係兄妹o黎咖咩....?

仔仔你緊係發夢見到美食嘞...訓緊覺都 o係度舐脷...

仔仔你仲唔係發夢見到美食?? 訓醒仲 o係度舐手指~~~

係咪好似小 Q 呢 ~~~

Kawaii 呢 ~~~

手術後首度曝光 (PG - 家長指引)

2007-09-17T18:58:00.000-07:00

露露o既傷口, 全長短過一寸, 淡紅色o既跡相信係藥水o黎o既。

仔仔o既紅噹噹咕咕, 後來先知其實係因為剃o左毛先至咁紅。

戴o左花花o既露露。

仔仔露露做o左絕育啦~~

2007-09-15T10:12:00.000-07:00

放低佢兩個o係 vet 度，真係有o的心痛，要全身麻醉喎... 露露仲要俾人開肚添...

貓奴夠鐘放工就一枝箭飛去接佢o地，助護話阿仔好惡，走去 hea 人o地隻狗。o下？阿仔未試過 hea 人咖喎...

終於見到佢o地啦... 係咁o係度哀鳴，貓奴就緊係即刻飛的返屋企啦... 一放監，見到佢o地俾人剃o左毛，傷口又紅哂，真係心都實埋，又唔係好食o野同飲水，露露仲慘，戴住個花花，做乜都唔方便，仲係咁倒後行。不過好彩，vet o既手勢好好，露露o既傷口一寸都冇。呢幾日貓奴都睇實佢o地，驚阿仔太錫露露走去幫佢舔傷口。

露露試過想自己跳上床，嚇死貓奴，一見佢個勢想跳就抱佢去佢想去o既地方。露露，哥哥姐姐心血少呀，唔嚇得咖，你快o的好返就乜都得，OK?

仔仔又大個仔啦~~

2007-09-15T09:17:00.000-07:00

o係做絕育手術o既前一日，為o左唔想仔仔露露見到陌生人而出爪整親人，於是貓奴就幫佢o地剪指甲。阿仔又好似平時咁有輕微反抗。點知... 佢竟然撞甩o左隻牙 = =" 隻牙上面仲有血咖，真係嚇死貓奴。但係阿仔就若無其事咁訓覺，仲要o係度打咕嚕 ~"~ 阿仔... 乜你唔痛咖咩...?

做手術o個朝，同 vet 講o左呢件事，佢檢查完阿仔個口，話佢有新牙仔出緊o黎。哦... 原來換牙咋... 虛驚一場。

仔仔又大個仔啦~~~

雙甘發脾四

2007-09-04T18:23:00.000-07:00

露露呢幾日發情, 為免搞出貓命, 屋企又冇籠,貓奴唯有將仔女輪流困房隔離。夜晚就仔仔同貓奴一齊訓, 露露o係廳。 (因為露露實在叫得太大聲, 所以迫於無奈唔俾佢一齊訓) 今朝貓奴起身, 放o左仔仔出廳食o野飲水去廁所, 困露露o係房。點知轉個頭入房, 露露分別o係兩個枕頭疴屎同疴尿, 然後再疴多次尿o係將被度。~"~ 露露成晚o係廳唔去疴, 偏偏入房短短幾分鐘就屎尿一齊o黎, 佢擺明嬲貓奴唔俾佢入房訓所以發脾四啦~~~

仔仔俾人困o係房, 一放監就追住貓奴隻腳o黎咬, 不過過一陣就冇事嘞。

哀哉... 此乃多事之秋矣...

神少少丫唔該...

2007-09-03T23:46:00.000-07:00

究竟係咪個個助護都係咁烚o下烚o下o既呢?? 尋晚打去 Vet 度 book 今個星期幫仔仔做 desex, 擘頭第一句已經話要 book Dr. Owen。事關貓奴未睇過佢, 唔知佢星期幾放假, 所以 book o左星期五。講完一大輪之後, 個助護先問我：「你o個隻係貓定狗?」 = =" #$#(%#)%&^)#&^

跟住同sugar 姐姐食飯，sugar 姐姐話：「唔係喎... Dr. Owen 好似星期五、六、日放假咖喎... 你打去問清楚好喎...」 o下? 唔係掛...

今朝打去, 應該係第二個助護聽。佢話：「係呀, Dr. Owen 星期五放假呀。今個禮拜 full 哂啦, 下個星期啦。」貓奴：「哦。」心諗：「#$#(%#)%&^)#&^!」

露露大個女啦~~

2007-09-02T18:10:00.000-07:00

露露呢幾日唔知做乜, 好似唔係好妥, 問佢做咩, 貓奴又未完全掌握貓語, 搞到貓奴好擔心, 古怪行徑有:

1) 由朝喵到黑, 一唔見貓奴就喵, 越喵越大聲, 喵到聲都沙哂...
2) 跟出跟入, 貓奴行到邊佢就跟到邊, 去洗手間就o係門口等你, 驚死貓奴走佬;
3) 冇咁落力玩;
4) 典地、"gut" 屁屁 + 後腳 "young young" o下;
5) 屁屁濕濕o地;

正當貓奴盤算係咪應該帶佢去睇 Vet o既時候, 卒之打電話俾 Ray 哥哥, Ray 哥哥一聽以上症狀, 得出一個結論 -- 露露發情 = ="

貓奴立即大為緊張, 將仔仔跟貓奴困o左入房, 以免搞出貓命。但係露露唔見貓奴, 又o係廳到喵到聲嘶力竭, 貓奴唔忍心，卒之調轉將露露困房, 留仔仔o係廳。點知露露見唔到仔仔, 又坐o係門前喵, 仔仔聽見露露喵得咁淒厲, 佢又o係廳隔住門o係度喵 ~"~ 唉... 好似上演緊一場「棒打鴛鴦」o既... = ="

貓奴仲一心諗住重陽節前一日同露露 desex, 睇o黎等唔切啦... 露露, 乜解救你咁早熟咖...

新一代可愛教主

2007-08-20T10:39:00.000-07:00

靚仔靚女

2007-08-09T09:22:00.000-07:00

睇o下~~我o地又靚仔靚女o左啦~~

你睇o下我幾英？

我梳靚o左個頭咖啦~~

仔仔o的睡姿真係睇極都唔厭，嘻嘻...

新晉人氣組合

2007-08-09T08:44:00.000-07:00

大家好，我o地o係穿屎。唔該排隊攞簽名相丫~~

快高長大

2007-07-29T04:20:00.000-07:00

仔仔露露好似食o左肥仔丸咁，仔仔大隻o左好多，雖然露露無仔仔咁大隻，但係都重o左好多。緊係啦... 哥哥錫佢o地錫到燶，o個頭話佢o地唔乖唔俾佢o地食零食，呢頭又扮失憶攞o的蟹柳絲出o黎，平時貓餅消耗量又驚人，唔肥仔就假啦... 未夠一個月已經KO o左一包大o既貓糧啦。不過食得玩得訓得先好咖嘛，係咪？

月頭o既燒春雞，宜家變o左隻燒鵝啦！

大將之風

2007-07-23T02:35:00.000-07:00

仔仔越o黎越有大將之風，尤其是o係訓覺o既時候...

你o地唔好嘈住本大爺訓覺呀o下！

我係The American's Top Model！

我跳o既《天鵝湖》好唔好睇呀？

你咪駛旨意趁我訓覺o個陣非禮我呀！

打針

2007-07-15T02:33:00.000-07:00

尋日帶o左仔仔同露露去Dr. Betty度打針。佢o地都好乖呀，只係o係貓袋度喵o左一陣。Dr. Betty話佢o地好健康呀，各位哥哥姐姐唔駛擔心。

我同Dr. Betty講，仔仔早兩日舔自己舔到咕咕都走埋出o黎，Dr. Betty話唔駛驚，仔仔得閒攞出o黎清潔o下啫。o下！咁都得?!

偉大工程

2007-07-09T21:16:00.000-07:00

今日我完成一大偉業，就係幫仔仔剪指甲嘞。仔仔同露露成日玩到癲哂，出哂爪唔記得收返埋，搞到我隻腳花哂。平時捉住佢o地剪指甲佢o地就反抗，所以我出絶招 -- 就係趁佢o地訓緊覺先剪，哈哈。過程都幾驚險，佢一郁我就即刻要停手，成日以為整醒o左o佢o地，點知1秒後又再訓過。

阿仔阿露...你睇你o地訓到... 你因住冷親個肚仔呀...

咪郁！舉高手扒埋牆！

我係體操王子!

朦面超人... 變...身!

我個側拱橋勁唔勁呢?

咪阻住我o地兩個訓覺呀！

左右門神

2007-07-08T01:09:00.000-07:00

仔仔同露露有個好得意o既習慣，就係每當有人o係洗手間沖涼o既時候，佢o地就最鍾意坐o係門口等你出o黎，好似左右門神咁。

日日打交

2007-07-08T00:53:00.000-07:00

仔仔同露幾乎每日都會打交，好似唔打過唔安樂咁。打到用牙咬，跌落水兜都試過。但係打完之後佢o地又會糖黏豆咁訓覺，真係服o左佢o地。但係活躍o的都好，咁先至係健健康康。

2007年7月2日 -- 去新屋企，yeah~~~

2007-07-06T03:37:00.000-07:00

甘仔甘露：

Ray哥哥今日帶我o地去街街。

喵~~Ray哥哥你帶我o地去邊呀?? 喵~~你快o的放我o地出o黎啦喎...

呢度邊度o黎咖??好驚呀... (腳都震哂) 都係企o係廁所頂最安全...

兩三個鐘後...

甘仔甘露：

喵~~呢度好好玩喎...我跳!

喵~~新哥哥姐姐都好好人丫...

喵~~o的毛毛好好玩呀。我捉!

我o地食得訓得玩得，仲識去自己個廁所疴臭臭添。你睇o下我o地訓到...